|
27.01.2012 |
|
Коми Республикаса Каналан Сöвет сувтiс оланпас бала дор, мый серти кансям ютыръяслы оз ков чукöртны бöрйысьысьяслысь кырымпасъяс быдсикас бöрйысьöмъяс нуöдiгöн
Коми Республикаса Каналан Сöвет сувтiс «Россия Федерацияса Федеральнöй Собраниелöн Каналан Думаса, Россия Федерацияса субъектъяслöн канму власьт органъясса да меставывса асвеськöдлан органъясса депутатъясöс бöрйигöн бöрйысьысьяслысь кырымпасъяс чукöртöмысь кансям ютыръясöс мездöмкöд йитöдын Россия Федерацияса оланпас пыртан торъя актö вежсьöмъяс пыртöм йылысь» федеральнöй оланпас бала дор, кутшöмöс вöзйис Россия Федерацияса Президент.
Оланпас баласö видлалiс Каналан Сöветса оланпастэчас да меставывса асвеськöдлöм кузя комитет. Комитетöн веськöдлысь Валерий Жилинöн вöзйöм серти Коми Республикаса Каналан Сöветöн Веськöдлысь Марина Истиховская ыстiс Каналан Думаса оланпасподув олапастэчас да канму тэчан комитетö лöсялана письмö.
Öнiя кадö кырымпасъяс оз чукöртны ютыръяс, кодъяслöн эмöсь петкöдлысьяс Госдумаын, дiнмуса оланпастэчас собраниеясын, муниципальнöй юкöнъясса бöрйöм органъясын, а сiдзжö ютыръяс, кодъяслöн эмöсь петкöдлысьяс РФ субъектъяслöн коймöд пайысь абу этшаджык оланпастэчас власьт органъясын.
Оланпастэчас урчитö, мый быдсикас бöрйысьöм нуöдiгöн, РФ Президентöс бöрйöм кындзи, став ютырсö мездöны бöрйысьысьяслысь кырымпасъяс чукöртöмысь. Сöмын öтйöза öтувъяслы, кодъяс оз лоны кансям ютыръясöн да кодъяслöн эм меставывса асвеськöдлан органъясö бöрйысьöмъяс дырйи бöрйысян öтувлöн статус, колö чукöртны наöн вöзйöм кандидатъяс дор кырымпасъяс. РФ Президентöс бöрйигöн Госдумаын абу петкöдлöм кансям ютыръяслы колö чукöртны кырымпасъяс.
Та вылö видзöдтöг чукöртöм кырымпас лыдыс чинö. Сiдзжö чинтöма кырымпас лыд, мыйта колö дiнмуса да меставывса бöрйысьöмъяс вылын кандидатъясöс пасйöм могысь. Сiйöс урчитöма РФ субъектлöн оланпасöн да оз вермы лоны унджык лöсялана бöрйысян кытшса мутасын пасйöм бöрйысьысьяслöн лыд серти 0,5 прöчентысь (öнiя кадö – 2 прöчент).
|
