|
21.02.2012 |
|
Людмила Афанасьева: «Федеральнöй оланпастэчасö вежсьöмъяс пыртöм чинтас челядь шойччöмын торкалöмъяслысь лыд»
Коми Республикаса Каналан Сöветлöн депутатъяс сувтiсны «Йöзлöн санитарно-эпидемиологическöй тыр-бур олöм йылысь» Федеральнöй оланпасса 28 статьяö да Административнöй инöд торкалöмъяс йылысь Россия Федерацияса кодекслöн 6.7 статьяö вежсьöмъяс пыртöм йылысь» федеральнöй оланпас бала дор.
Социальнöй политика комитетöн веськöдлысьöс вежысь Людмила Афанасьева тöдчöдiс, мый оланпас бала медводдзаысь урчитö чина йöзлы да юридическöй кывкутысьяслы челядьлöн шойччан да бурдöдан организацияясын быдтан-сöвмöдан да велöдан условиеяс дорö санитарнöй корöмъяс торкалöмысь кывкутöм.
Öнiя кадö кывкутöмсö урчитöма сöмын вердöмлöн да юан валöн качествоысь. Унджык челядьöс бурдöдан лагерьясын öнi збыльмöдöны торъя велöдан уджтасъяс, зiля вöдитчöны öнiя технологияясöн, велöдöмын выль техническöй средствоясöн. «Миянлы колö эскыны, мый челядьлöн занятиеяс дырйи да шойччигöн öпастöм условиеяс, налöн эм ставыс дзоньвидзалун бурмöдöм могысь, оз позь, медым артмис шог лоöмтор», − пасйис депутат.
Оланпас бала дасьтысьяслöн серти, сöмын 2010 воын Россия Федерацияын вöчöма челядь шойччöм да бурдöдöм котыртöмын административнöй инöд торкалöмъяс йылысь кызь сюрс гöгöр решение, штраплöн шöркодь ыджаыс лоис 1,6 сюрс шайт. Оланпас балаын вöзйöны челядь шойччан да бурдöдан условиеяс дорö, а сiдзжö бурдöдан лагерьясын быдтан-сöвмöдан да велöдан условиеяс дорö санитарно-эпидемиологическöй корöмъяс торкалöмысь урчитны штрап чина йöзлы 3-сянь 7 сюрс шайтöдз, а юридическöй кывкутысьяслы – 30-сянь 70 сюрс шайтöдз.
«Вежсьöмъясыс чорзьöдасны челядь шойччöм котыртысьяслысь кывкутöмсö да ёна чинтасны челядь лагерьясын торкалöмъяслысь лыдсö», − лыддьö Людмила Афанасьева.
Тайö оланпас баласö кутасны видлавны РФ ФС Каналан Думаса тувсовъя сессия дырйи.
|
