|
21.02.2012 |
 Марина Истиховская: потребительскöй кооперация сöвмас, кутас кö выльмöдны асьсö да пыртны уджö выль технологияяс
Урасьöм тöлысь 21 лунö Сыктывкарын мунiс Коми Республикаса потребительскöй котыръяслöн союзса собрание, кöнi кывкöрталiсны 2011 вося удж да вынсьöдiсны 2012 во вылö дiнмуын потребкооперация сöвмöдан уджтас. Собрание уджö пырöдчис Коми Республикаса Каналан Сöветöн Веськöдлысь Марина Истиховская. М. Истиховская пасйис, мый потребкооперациялы канмусянь отсöгыс ёнджыкасö инмас предприятиеясöс техническöя выльмöдöмö да инвестиция проектъяс збыльмöдöмö. Сылöн видзöдлас серти, потребительскöй кооперация сöвмас, кутас кö выльмöдны асьсö да пыртны аслас уджö выль технологияяс.
"Эмöсь потребкооперация сöвмöдöм кузя мытшöдъяс, кутшöмъясöс колö öтув разьны олöмö пöртысь власьт органъяслы да оланпас пыртысь власьт органъяслы, меставывса асвеськöдлан органъяслы. Талунъя уна юалöмыс, кутшöмъясöс лэптöны кооператоръяс, йитчöмаöсь потребительскöй котыръяс да МСУ-са органъяс костын абу тырвыйö öтувъя удж понда. Потребительскöй котыръяскöд ёртасьöм йылысь юалöмъяссö депутатъяс вермасны кыпöдны муниципальнöй юкöнъясса юралысьяскöд Сöветъясса юрнуöдысьяслöн Сöвет котыртiгöн", - висьталiс М. Истиховская.
Каналан Сöветöн Веськöдлысь серти, потребительскöй кооперативъяслы талун колö вынъяс индыны видз-му овмöс прöдукция переработайтöм вылö. "Вузасьöмын ордйысьöмыс содö, та вöсна потребительскöй котыръяслы колö тöд вылö босьтны спрослысь вежсьöмъяссö, перерабатывайтны прöдукция да вузавны республикаса рынок вылын быдсикас ньöбасьысьлы", - пасйис М. Истиховская.
|
